UNESCO Participation Programme යනු, යුනෙස්කෝ සංවිධානය සමඟ නිල හවුල්කාරිත්වයෙන් සාමාජික රටවල් සහ රාජ්‍ය නොවන සංවිධාන විසින් යෝජනා කරනු ලබන ජාතික, උප කලාපීය, කලාපීය සහ අන්තර් කලාපීය ව්‍යාපෘති සඳහා සහාය වීමෙන් UNESCO’s Regular Programme සඳහා අනුපූරක වන වැදගත් යාන්ත්‍රණයකි. එය යුනෙස්කෝ සංවිධානය, එහි සාමාජික රටවල් සහ සිවිල් සමාජය අතර සහයෝගිතාව ශක්තිමත් කරන අතරම, රටවල් සහ කලාපීය මට්ටමින් සංවිධානයේ කාර්යභාරයේ දෘශ්‍යතාව සහ බලපෑම වැඩි දියුණු කරයි.  

යුනෙස්කෝ සංවිධානය විසින් මෙම වැඩසටහන හරහා, සාමාජික රටවලට තම සංවිධානයේ විධිනියෝගයට අනුකූලව අධ්‍යාපනය, විද්‍යාව, සංස්කෘතිය, සන්නිවේදනය සහ තොරතුරු යන ක්ෂේත්‍රවල ප්‍රමුඛතා මූලාරම්භයන් ක්‍රියාත්මක කිරීමට සහාය ලබා දේ. ඒ සඳහා විශේෂඥ සහ උපදේශක සේවාවන්, පුහුණු වැඩසටහන් සහ ශිෂ්‍යත්ව, ප්‍රකාශන, උපකරණ මෙන්ම සමුළු, සම්මන්ත්‍රණ සහ ධාරිතා වර්ධන ක්‍රියාකාරකම් සඳහා අවස්ථා සපයයි. ස්ත්‍රී-පුරුෂ සමානාත්මතාව, යෞවනයන්, තිරසර සංවර්ධනය සහ සංවර්ධනය වෙමින් පවතින රටවල අවශ්‍යතා කෙරෙහි විශේෂ අවධානයක් යොමු කෙරේ.

සාමාජික රටවලට සෑම ද්විවාර්ෂික කාලසීමාවක් සඳහාම, යුනෙස්කෝ සංවිධානය සඳහා වූ ඔවුන්ගේ ජාතික කොමිෂන් සභා හරහා, ජාතික ප්‍රමුඛතාවන් අනුව ශ්‍රේණිගත කර ඇති ව්‍යාපෘති යෝජනා උපරිමව හතක් (07) ඉදිරිපත් කිරීමට අවස්ථාව ලබා දී ඇත.